Loading...

– रवीन्द्र मिश्र

पर डाँडाको टुप्पोमा
मन्दिर छेक्ने ठूऽऽऽलो घर बनेछ
पाप र श्रापको समय-चक्रले होला
ईश्वरभन्दा मान्छे अग्लो भएछ

मध्य शहरको बीचमा
देउतै देउताको चौक छेक्ने
विशाल ‘मल’ बनेछ
इमानभन्दा पैसा पुज्ने युगमा
ईश्वरभन्दा ‘अर्थ’ ठूलो भएछ

पशुपतिको गौचरमा
गाई होइन मान्छे चर्न थालेका छन्
नदी किनारमा आजभोली
धान होइन पैसा झुल्न थालेका छन्

मन्दिरमा ट्वाइलेटको टायल टाँसेर
पुजा गर्ने पुस्ता बन्यौँ हामी
मुर्तिमा गाईको दुध चढा’र
मन्दिरै छेउ
मैदान बस्ने पुस्ता भयौँ हामी

देउतै देउताको बीचमा उभिएर
मान्छे सफेद झूठ बोल्ने भएछ
सत्य हराएको युग भएर होला
ऊ ईश्वरलाई लाटो
आफूलाई बाठो देख्ने भएको छ

पर डाँडाको टुप्पोमा
मन्दिर छेक्ने ठूऽऽऽलो घर बनेछ
कलियुग भएरै त हुनुपर्छ
ईश्वरभन्दा मान्छे अग्लो भएछ।

तपाईलाई कस्तो लाग्यो ? यहाँ कमेन्ट गर्नुहोस् ।
Loading...