Loading...

बिहान ४ बजे गाग्रो बोकेर
घरबाट केहि टाढा
पधेरामा लामबद्ध 
दार्चुलाका दिदी बहिनी

बिहानको घर धन्दा सक्ने बित्तिकै
११ वर्षकी छोरी लिएर
घाँसको जोहो गर्न निस्किएकी
कालिकोटकी महिला,

दैनिक श्रीमानको कुटाई सहदै
केहि बर्ष अगाडि
चुनाव जितेकी गुल्मीकी
महिला प्रतिनिधि काकी आमा,

कलेज टप गरेर
नर्स पढ्न पोखरा गएकी
तर पढ्न नपाएकी
एउटी आन्दोलनरत बिद्यार्थी,

श्रीमानले सौता हाले पछि
अधिकारको खोजीमा
न्याँय पाइन्छ भनेर कुर्दै गरेकी
ठूला नेताकी बुहारी,

जनकपुरमा बिहे गरेर
घरजम सम्म हुन नपाउदै
दाइजोको निहुँमा सासुले
जीउँदै जलाईएकी भुनियाँ,

जति प्रगति गरे पनि
चुनाव जिते पनि
देशको प्रतिनिधित्व गर्दै
बिदेशमा
महिला अधिकारका कुरा गरे पनि
घरमै पिडित
झापाकी दिल कुमारी,

दार्चुलाका दिदि बहिनी
कालिकोटकी महिला
गुल्मीकी काकी आमा
पोखराकी बिद्यार्थी
नेताकी बुहारी
जीउँदै जलाइएकी भुनियाँ
झापाकी दिल कुमारी
आज पनि न्याँय पाउने आशामा
घर घरमा छन्।

उनीहरुले न्याँय नपाए सम्म
सबै महिलाले
समान अवसर नपाए सम्म
नारी दिवस केवल दिवस मात्र हुन्छ।
शहिद दिवस जस्तै
गरिवी निवारण दिवस जस्तै
मात्र केवल दिवस हुनेछ।

तपाईलाई कस्तो लाग्यो ? यहाँ कमेन्ट गर्नुहोस् ।
Loading...